Прэм’ер-міністр Польшчы Дональд Туск заявіў пра значнае скарачэнне колькасці нелегальных перасячэнняў усходняй мяжы краіны. Паводле яго слоў, узмацненне візавай палітыкі і ўвядзенне абмежаванняў на права прытулку дазволілі дасягнуць такіх вынікаў.
«Мы ўзмацнілі нашу візавую палітыку і, найперш, вырашылі прыпыніць дзеянне права на прытулак усюды, дзе мы маем справу з масавымі перасячэннямі мяжы, арганізаванымі Беларуссю і Расеяй. І сёння ўсходнюю мяжу Польшчы перасякае на 10 разоў менш нелегальных мігрантаў, чым да ўвядзення нашых абмежаванняў», — заявіў Туск.
Паводле інфармацыі Падляшскага аддзялення Памежнай службы Польшчы, у 2024 годзе польскія памежнікі зафіксавалі 30 тыс. спроб нелегальнага перасячэння мяжы супраць 26 тыс. годам раней.
13 студзеня 2025 года Польшча не зафіксавала ніводнай спробы пранікнення мігрантаў з тэрыторыі Беларусі. У апошні раз «нулявая» статыстыка была адзначана 9 студзеня, а 7 і 8 студзеня колькасць выяўленых спроб не дасягала 10 у дзень.
