У Літве гатовы разгледзець унясенне змяненняў у Канстытуцыю, калі саюзнікі прымуць рашэнне пра размяшчэнне ядзернай зброі або яе кампанентаў у краіне. Пра гэта паведаміла міністр абароны Давіле Шакалене, піша Delfi.
Паводле яе слоў, “існуюць магчымасці” змяніць артыкул 137 Канстытуцыі Літвы, які зараз забараняе размяшчэнне на тэрыторыі краіны зброі масавага знішчэння і замежных ваенных баз.
Цяпер, адзначыла міністр, канкрэтных прапаноў ад саюзнікаў няма, аднак, кажа, Літва павінна быць гатова, калі будуць прыняты адпаведныя рашэнні.
“Мая пазіцыя як міністра абароны, заключаецца ў тым, што мы ўсё ж такі павінны ініцыяваць больш глыбокую дыскусію і ацэнку гэтага пытання”, – адзначыла Шакалене.
У цэлым міністр лічыць, што Літва павінна рыхтавацца да магчымых пагроз, дзейнічаючы па прынцыпе, “нібыта заўтра будзе вайна”, бо калі такая непасрэдная пагроза з’явіцца, часу нешта змяніць не будзе.
