Ніякіх “чырвоных ліній” па падтрымцы Украіны Францыя не мае. Пра гэта ў інтэрв’ю Бі-Бі-Сі сказаў міністр замежных спраў Францыі Жан-Ноэль Баро.
Паводле яго слоў, Украіна можа прымяняць па тэрыторыі РФ французскія ракеты вялікай далёкасці “ў логіцы самаабароны”. Пры гэтым ён не пацвердзіў, што французская зброя ўжо выкарыстоўвалася Кіевам.
“Прынцып быў устаноўлены… Нашы пасланні прэзідэнту Зяленскаму былі добра ўспрыняты”, – адзначыў дыпламат.
У той жа час ён падкрэсліў, што заходнія саюзнікі не павінны ўводзіць ніякіх абмежаванняў на падтрымку Украіны і не ўстанаўліваць “чырвоныя лініі”. Пры гэтым на пытанне, ці можа гэта азначаць удзел французскіх войскаў у вайне, палітык адказаў, што “мы не выключаем ніводнага варыянту”:
“Мы будзем падтрымліваць Украіну настолькі інтэнсіўна і колькі трэба. Чаму? Таму што на коне наша бяспека. Кожны раз, калі расейскае войска прасоўваецца на адзін квадратны кіламетр, пагроза набліжаецца да Еўропы на адзін квадратны кіламетр”.
