Дыпламаты з Расеі і ЗША сустракаюцца сёння, 27 лютага, у Стамбуле, каб абмеркаваць спрэчкі наконт сваіх дыпламатычных прадстаўніцтваў, паколькі абодва бакі працягваюць дыялог, які лічыцца вырашальным для спынення вайны ва Украіне.
Расейская дэлегацыя ўжо прыбыла ў Стамбул, дзе пройдуць яе перамовы з амерыканскай дэлегацыяй. Сустрэча адбудзецца ў стамбульскай рэзідэнцыі генеральнага консула ЗША. На парадку дня – пытанні дзейнасці амбасадаў, перадае ТАСС.
Перад сядзібай сабраліся некалькі дзясяткаў журналістаў. Перамовы пройдуць у закрытым рэжыме; бакі не назвалі імёны сябраў сваіх дэлегацый.
Нагадаем, што дэлегацыі на чале з дзяржаўным сакратаром ЗША Марка Рубіё і міністрам замежных спраў Расеі Сяргеем Лаўровым дамовіліся на мінулым тыдні ў Саудаўскай Аравіі пачаць дыскусіі аб дыпламатычных прадстаўніцтвах.
Беларускае Радыё Рацыя
