28 беларускіх журналістаў знаходзяцца зараз за кратамі ў Беларусі. Краіна займае чацвёртае месца ў свеце па колькасці зняволеных журналістаў. Такія лічбы агучыў кіраўнік Беларускай асацыяцыі журналістаў Андрэй Бастунец 18 снежня падчас журналісцкага форуму. Яго зладзілі беларускія і літоўскія журналісты разам з прадстаўнікамі літоўскай улады ў Цэнтры візітаў Сейма Літвы.
На пачатку ўсіх прывітаў спікер Сейма Літвы Юозас Олекас, які зазначыў важнасць заставацца сапраўднымі журналістамі ў такі складаны час, бо голас журналістаў – гэта голас свабоды.
Як кажа старшыня Беларускай асацыяцыі журналістаў Андрэй Бастунец, самая галоўная праблема – гэта тое, што сябры арганізацыі за кратамі, і ён спадзяецца на хуткае іх вызваленне:
-Мы ж разумеем, што кожны дзень за кратамі – гэта год, выкрэслены з жыцця. Тыя, хто выйшлі на волю, яны ж таксама сутыкаюцца з праблемамі. Па-першае, гэта нельга нават сказаць, што яны выйшлі на волю, бо гэта не зусім воля. Шмат хто з іх нават дакументаў не мае. Яны не могуць вярнуцца ў Беларусь і выбраць краіну, дзе яны могуць пражываць.
Паводле старшыні Саюза журналістаў Літвы Аўдрыса Антанайціса, літоўскім журналістам да праблем беларускіх яшчэ далёка, але яны ў дэмакратычнай дзяржаве пратэстуюць таксама супраць замаху на свабоду слова:
-Тое, што адбываецца зарз у Літве, гэта крыху нязвыкла для Літвы, бо набыло даволі вострае гучанне. І гэта зразумела па тым, што ўсё ж такі грамадскі вяшчальнік – гэта вельмі важнае звяно ў грамадскім полі свабоднага слова. Але гэта толькі адно звяно, але ёсць звяно і другое, і бюджэтнае фінансаванне, якое ўсё ж такі вельмі вялікае.
Напрыканцы беларуска-літоўскага журналісцкага форуму адбылася цырымонія ўручэння прэміі “Надзея Свабоды”. Сёлета яе атрымаў былы палітвязень, галоўны рэдактар “Рэгіянальнай газеты” Аляксандр Манцэвіч.
Цалкам матэрыял:
Беларускае Радыё Рацыя
