Перамовы дэлегацый Кіева і Вашынгтона па мірным плане прайшлі ў ЗША. Пра гэта паведаміў сакратар Рады нацбяспекі і абароны Украіны Рустэм Умераў. Ён паведаміў, што пра вынікі дыялогу далажылі прэзідэнту Уладзіміру Зяленскаму.
Сталы прадстаўнік ЗША пры NATO Мэт Уітакер заявіў, што працэс выйшаў на завяршальную стадыю і што для вырашэння ключавых пытанняў «усім неабходна закатаць рукавы». Паводле яго слоў, шанцы на дасягненне мірнага пагаднення ёсць. Дзяржсакратар Марка Рубіё паведаміў, што кампраміс паміж Расеяй і Украінай можа быць дасягнуты ўжо на гэтым тыдні ці ў студзені. Па словах Рубіё, праца над урэгуляваннем вядзецца кругласутачна.
У сваю чаргу спецпрадстаўнік прэзідэнта Расеі Кірыл Дзмітрыеў вылецеў у Маямі на перамовы са спецпасланнікам прэзідэнта ЗША Дональда Трампа Стывам Уіткафам і дарадцам Джарэдам Кушнерам. Па дадзеных Reuters, трохбаковыя сустрэчы з удзелам Украіны не плануюцца. Кантакты працягнуцца бліжэйшыя два дні.
