Вайна ва Украіне. Новапрызначаная міністр замежных спраў Латвіі Байба Бражэ заявіла, што Украіна атрымала ад некаторых партнёраў заходнюю зброю з дазволам біць па расейскай тэрыторыі.
Цяпер Украіна атрымлівае зброю ад заходніх партнёраў з публічнай перасцярогай пазбягаць удараў за межамі Украіны. Аднак, як лічыць Бражэ, такі падыход можа змяніцца, і нават больш — ён ужо мяняецца.
«Ужо цяпер ёсць краіны, якія ўжо далі Украіне зброю, без падобных абмежаванняў», — сказала кіраўнік МЗС Латвіі.
Бражэ патлумачыла, што ў гэтых выпадках аб зняцці абмежаванняў не казалі публічна.
Латвійская міністр выказала перакананне, што калі ёсць аб’екты, з якіх Расея атакуе Украіну, то Украіна мае права на ўдар у адказ, калі гэтыя аб’екты размешчаныя на расейскай тэрыторыі. Па словах Бражэ, такое прымяненне зброі дазваляе міжнароднае права.
Тым часам, як паведамляюць украінскія СМІ, позна вечарам у сераду Расея ізноў абстраляла ракетамі Адэсу. Пацярпелі 14 чалавек, пашкоджаная цывільная інфраструктура. Удар справакаваў моцныя пажары.
Беларускае Радыё Рацыя
Фота з адкрытых крыніц інтэрнэта
