Выканаўцам абавязкаў прадстаўніка Аб’яднанага пераходнага кабінета па замежных справах прызначаны Уладзімір Астапенка. Валерый Кавалеўскі, які займаў гэтую пасаду, падаў сёння, 26 чэрвеня, у адстаўку, паведамляе тэлеграм-канал АПК.
Рашэнне аб прызначэнні Астапенкі прыняла кіраўнік АПК Святлана Ціханоўская. Да гэтага ён быў намеснікам прадстаўніка па замежных справах.
Уладзімір Астапенка – дыпламат, кандыдат юрыдычных навук, кіраўнік Місіі дэмакратычнай Беларусі ў Бруселі. У 2020 годзе ён падаў прашэнне аб вызваленні ад пасады надзвычайнага і паўнамоцнага пасла Беларусі ў Аргенціне, а потым далучыўся да Аб’яднанага пераходнага кабінета.
Валерый Кавалеўскі патлумачыў рашэнне скласці з сябе паўнамоцтвы ўзніклымі рознагалоссямі ў «стратэгічным бачанні шляхоў дасягнення мэт дэмакратычнага руху, у арганізацыі і тактыцы вядзення працы, а таксама ў падыходах да ўнутранай палітыкі».
