Польшча не мае намеру закрываць мяжу з Беларуссю для пасажырскага руху, вынікае з заявы міністра замежных спраў гэтай краіны Радаслава Сікорскага. “Не будзем ускладняць жыццё простым палякам і беларусам”, – сказаў ён у эфіры Radio Zet.
Беларусь, паводле слоў Сікорскага, “дасылае сотні мігрантаў з расейскімі візамі”, фактычна ўручную кантралюючы колькасць тых, хто спрабуе перайсці мяжу нелегальна. Бываюць месяцы, “калі колькасць мігрантаў роўная нулю”, а бывае, што мяжу спрабуе перайсці “300-400 чалавек у дзень”, дадаў ён.
Толькі ад Менска залежыць, якімі будуць яго добрасуседскія адносіны з Польшчай, падкрэсліў Сікорскі. “Нашы базавыя патрабаванні – каб на волю выйшаў Анджэй Пачобут і спынілася сілавая перакідка мігрантаў”, – дадаў міністр.
Кіраўнік Міністэрства ўнутраных спраў і адміністрацыі Польшчы Томаш Семаняк у інтэрв’ю Polsat News напярэдадні не выключыў розных варыянтаў развіцця падзей на мяжы з Беларуссю, адзначыўшы, што пры іх прыняцці Польшча будзе арыентавацца на свае “ўнутраныя інтарэсы”.
Беларускае Радыё Рацыя
