На палях Мюнхенскай канферэнцыі па бяспецы 14 лютага адбыўся сайд-івент «Беларусь у восі CRINK: як Захад шукае адказ на аўтарытарныя альянсы», прысвечаны ролі Беларусі ў такіх альянсах і магчымым стратэгіям рэагавання з боку дэмакратычных краін.
Каментуючы вынікі дыскусіі, арганізатар і кіраўнік Інстытута бяспекавых даследаванняў імя Касцюшкі Вадзім Мажэйка адзначыў, што Беларусь фактычна ўжо ўбудаваная ў так званую «вось CRINK» — Расея, Кітай, Іран і Паўночная Карэя:
-Гэта, канешне, вайскова-прамысловы комплекс, мы бачым, што Беларусь дапамагае Расеі збіраць дроны. Шмат падвойнага прызначэння гандлю з Кітаем. Таксама, безумоўна, гэта прадастаўленне беларускай тэрыторыі, уплыў на грамадства.
Святлана Ціханоўская, адкрываючы сустрэчу, падкрэсліла, што Беларусь сёння выкарыстоўваецца як інструмент вайны Расеі супраць Украіны. Каментуе Вадзім Мажэйка:
-Яна казала важныя рэчы пра Беларусь, як фарпост “восі зла” ў Еўропе. Казала пра маючую адбыцца сустрэчу з Зяленскім у Кіеве.
Як адзначае Вадзім Мажэйка, ключавы пасыл сайд-івенту: у тым, што Беларусь у сферы бяспекі застаецца актыўным гульцом з вялікім патэнцыялам, і цяпер галоўнае пытанне — хто будзе карыстацца гэтым патэнцыялам у будучыні. Удзельнікі дыскусіі таксама абмеркавалі санкцыйную палітыку, ваенна-тэхналагічнае супрацоўніцтва паміж аўтарытарнымі рэжымамі і магчымыя сцэнары развіцця сітуацыі ў Беларусі ў сярэднетэрміновай перспектыве.
Цалкам гутарка:
Беларускае Радыё Рацыя
