175 кандыдатаў на 80 месцаў. Гэта інфармацыя пра выбары ў Каардынацыйную Раду. Учора быў апошні дзень падачы спісаў. Сёння ўжо ведаем усе палітычныя групы, якія ідуць, альбо не ідуць на выбары, напрыклад, фракцыя «Наша справа» Беларускія хрысціянскія дэмакраты.
Госць Рацыі – Віталь Рымашэўскі, прадстаўнік гэтай фракцыі.
Віталь Рымашэўскі: Што датычна Каардынацыйнай Рады, то нашая фракцыя «Наша справа» Беларускія хрысціянскія дэмакраты яшчэ застаецца ў складзе ранейшай Каардынацыйнай Рады, я з’яўляўся спікерам гэтай фракцыі. Яшчэ два месяцы да канца гэтага склікання мы працуем у КР.
РР: Вы не ідзяце ў новы склад КР, таксама ёсць заява ад фракцыі «Наша справа» Беларускія хрысціянскія дэмакраты з гэтай нагоды. На яе аснове будзем з вамі размаўляць. Якія галоўныя праблемы ў КР вы бачыце, і як прымалася такое рашэнне?
Віталь Рымашэўскі: На жаль, на сённяшні дзень Каардынацыйная Рада не апраўдала тую функцыю, тую місію, якую мы бачылі для гэтага органа, а менавіта КР мусіла стаць такім мастом хаця б паміж актывістамі дэмакратычнай супольнасці і лідарамі дэмакратычных сілаў. На жаль, гэтага не адбылося. Хачу сказаць, што нашая фракцыя брала актыўны ўдзел у працы КР, мы былі ініцыятарамі і заснавальнікамі камісій, у тым ліку камісіі аб адукацыі, бралі ўдзел у працы іншых камісій. Наш прадстаўнік быў у дэлегацыі Парламенскай асамблеі Рады Еўропы. Мы правялі некалькі слуханняў, у тым ліку слуханне па парушэнні права на свабоду сумлення і ціск на рэлігійныя супольнасці у Беларусі. Таксама слуханні пра гібрыдную агрэсію Расейскай Федэрацыі супраць Беларусі. І гэтую працу мы будзем працягваць па-за Каардынацыйнай Радай, бо КР не апраўдала сваю фунуцыю.
Вось адбываюцца выбары, у нас мінулы раз удзельнічала ў выбарах 6 тысяч чалавек. У гэтых, я думаю, на жаль, будзе нашмат меней.
Мы бачылі КР адмысловым інструментам для ўзгаднення пазіцый. Давайце ўзгадаем колькі разоў за апошнія пяць гадоў лідары дэмакратычных сілаў звярталіся да грамадскай думкі, – у якасці апытанняў, у якасці галасавання на любых платформах па важных пытаннях, якія выносяцца ў міжнародную павестку дня: перамовы з рэжымам Лукашэнкі, альбо санкцыі, альбо візавыя абмежаванні і г.д. На жаль, ніводнага разу гэта зроблена не было, хаця такі інструмент ёсць. Гэтага не адбылося.
Цалкам размова:
Беларускае Радыё Рацыя
