Міністр замежных спраў Беларусі Сяргей Алейнік страціў пост пасля інфармацыі пра самазабойства экс-пасла ў ФРГ Сідарэнкі і публічнай заявы пра гатоўнасць весці з Польшчай перамовы па пытанні незакрыцця мяжы.
Сваю версію адстаўкі Алейніка агучыў прадстаўнік Працоўнай групы КР па мабільнасці і легалізацыі беларусаў Віталь Рымашэўскі:
– Магчыма гэта супадзенне – адстаўка міністра замежных спраў і яго заявы пра перамовы з Польшчай наконт транзіту грузаў, таму што міністр замежных спраў, і зрэшты іншыя міністэрствы, яны не дзейнічаюць абасоблена ад Лукашэнкі. А справа адстаўкі Алейніка магла быць звязаная як мінімум з давядзеннем да самазабойства з боку беларускіх спецслужбаў, беларускага рэжыму былога амбасадара Беларусі ў Нямеччыне. Гэта быў адзін з самых ліберальных прадстаўнікоў празаходняга крыла ў беларускай уладзе. Я меў некалькі разоў спатканне з гэтым чалавекам.
Адпаведна Віталь Рымашэўскі распавёў пра захады КР па недапушчэнні закрыцця мяжы Польшчай для грамадзян Беларусі:
– Маем сталую камунікацыю з аб’яднаннем бізнесоўцаў Падляшша, каторыя таксама звярталіся да польскага ўраду з тым, каб адчыніліся зачыненыя памежныя пераходы. Пакутуюць сёння не толькі беларусы, але таксама грамадзяне Рэспублікі Польшча, якія жывуць на памежжы. Таму што гэта падрывае і эканоміку, бо ў асноўным яна была павязаная на тым, што простыя беларусы ездзілі, наведвалі Польшчу, куплялі тут тавары, атрымлівалі паслугі.
Таксама, па словах Віталя Рымашэўскага, працоўная група КР рыхтуе зварот у МЗС і Памежную службу Польшчы пра недапушчэнне закрыцця пераходаў на мяжы для грамадзян Беларусі.
Цалкам матэрыял:
Беларускае Радыё Рацыя
