У Ісламабадзе, куды прыляцеў Аляксандр Лукашэнка, адбываюцца сутыкненні, ёсць ахвяры.
Як паведамляе “Бі-Бі-Сі”, пратэстоўцы патрабуюць вызвалення з турмы былога прэм’ер-міністра Імрана Хана. Сутыкненні адбыліся на цэнтральнай плошчы сталіцы Пакістана. Паліцыя выкарыстала для разгону людзей слёзацечны газ і гумовыя кулі.
Улады сцвярджаюць, што падчас сутыкненняў загінулі чатыры салдаты і ўскладаюць адказнасць за гэта на пратэстоўцаў. Раней у Пакістане забаранілі любыя вулічныя акцыі. У Ісламабадзе адмянілі заняткі ў школах. У горадзе “практычна не працуе інтэрнэт”.72-гадовы Імран Хан знаходзіцца за кратамі больш за год. Яго асудзілі па абвінавачванні ў карупцыі і разгалошванні дзяржаўнай таямніцы (асуджаная і яго жонка). Днямі ён звяртаўся да сваіх прыхільнікаў і заклікаў арганізаваць вулічныя акцыі пратэсту.
Актыўна супрацоўнічаць Беларусь і Пакістан пачалі адносна нядаўна. Беларуская амбасада адчынілася ў Ісламабадзе толькі ў 2014 г., пакістанская ў Менску — праз год. Дасюль Лукашэнка наведваў Пакістан двойчы, у 2015 і 2016 гадах.
