PKW падала вынікі прэзідэнцкіх выбараў пасля падліку 99% галасоў. Ужо палічаны ўсе галасы за мяжой, на караблях і платформах, а таксама ў 10 ваяводствах. Паводле папярэдніх звестак late poll у першым туры перамог Рафал Тшаскоўскі, які набраў 31,2 % галасоў. Другое месца заняў Караль Наўроцкі – 29,7 %.
Другі тур выбараў пройдзе 1 чэрвеня.
Паводле афіцыйных даных PKW Рафал Тшаскоўскі выйграў сярод іншага ў Торуню, Аполю, Тарнабжэгу, Еленей Гуры, Чэнстахове, Жэшуве, Забжу і Кракаве. Караль Наўроцкі перамог між іншым у Замосцю, Радаме, Сувалках, Бельхатаве, Бялай Падляскай і Ястшэмбю-Здрую.
***
Кандыдат Грамадзянскай кааліцыі Рафал Тшаскоўскі перамагае ў першым туры прэзідэнцкіх выбараў з вынікам 30,8 працэнтаў – гэта вынікае з вынікаў экзіт-полу Ipsos, які праведзены па дамове з тэлебачаннем Polsat, TVP i TVN.
Другое месца паводле гэтых папярэдніх звестак займае кандыдат, якога падтрымлівае “Права і справядлівасць” – Караль Наўроцкі – за яго прагаласавалі 29,1%. Аднак розніца паміж гэтымі двума кандыдатамі ў межах статыстычнай пагрэшнасці.
Трэці вынік паводле экзіт-полу паказаў кандыдат ад Канфедэрацыі Славамір Менцэн – у яго вынік 15,4%.
Чацвёртая пазіцыя у кандыдата Канфедэрацыі Кароны Польскай Гжэгажа Браўна – яго падтрымалі 6,2%.
Пяты вынік паказвае пакуль паводле экзіт-пола кандыдат ад “Разам” – Адрыян Зандберг – 5,2%.
Шыман Галоўня на шостым месцы – 4,8%.
Далей размясціліся:
Кандыдатка лявіцы і віцэ-маршалак Сенату Магдалена Бейят – 4,1%
Ёанна Сенышын – 1,3%
Кшыштаф Станоўскі – 1,3%
Марэк Якубяк – 0,8%
Артур Барташэвіч – 0,5%
Мацей Мацяк – 0,4%
Марэк Вох – 0,1%
Паводле экзіт-полу яўка на выбарах склала 66,8%.
Беларускае Радыё Рацыя
