Міністр замежных спраў Нямеччыны Аналена Бербок прыехала ва Украіну. Гэта ўжо пяты яе візіт з пачатку поўнамаштабнай вайны.
“Наша падтрымка грунтуецца на глыбокай веры ў тое, што Украіна пераможа ў гэтай вайне”, — сказала яна. У МЗС падкрэслілі, што цяпер важна не спыняць судовую рэформу, барацьбу з карупцыяй, не абмяжоўваць свабоду СМІ.
“Мэта візіту міністра замежных спраў — запэўніць украінскіх суразмоўцаў, нават з улікам абвастрэння сітуацыі ў зонах ваенных дзеянняў, што Нямеччына і Еўропа будуць і надалей цвёрда стаяць на баку Украіны і не адмовяцца ад сваёй падтрымкі”, – паведамляе нямецкае знешнепалітычнае ведамства.
