Прадстаўнік Аб’яднанага Пераходнага Кабінета Беларусі Арцём Брухан пракаментаваў заяву АПК адносна агрэсіўных намераў Расейскай Федэрацыі па ўмяшанні ва ўнутраныя справы Беларусі.
Ён адзначыў яе своечасовасць і прынцыповую важнасць у актуальнай геапалітычнай сітуацыі:
-Мэтанакіраваная, скаардынаваная спроба Расеі ўлазіць ва ўнутраныя справы Беларусі. Упершыню афіцыйная заява Захаравай, што пры неабходнасці можа быць рэалізаваны артыкул аб стратэгічнай бяспецы, расейскія войскі могуць быць уведзены на тэрыторыю Беларусі для падаўлення мецяжу. Адбываецца гэта за два тыдні да паседжання Вышэйшага дзяржаўнага савета Саюзнай дзяржавы. Дэманстрацыя, што Лукашэнка не самастойная фігура.
Асобна Брухан падкрэсліў, што заклік да Круглага стала ў першую чаргу адрасаваны да беларускіх палітычных эліт, незалежна ад іх дачынення да пануючай улады. Заява Аб’яднанага Пераходнага Кабінета была апублікаваная 12 лютага 2026 года ў Варшаве і ўтрымлівае ацэнку публічных выказванняў расейскіх афіцыйных асобаў, якія, паводле АПК, сведчаць пра гатоўнасць Крамля да прамога ўмяшання ва ўнутраныя працэсы ў Беларусі.
Цалкам гутарка:
Тэкст заявы:
Заява Аб’яднанага Пераходнага Кабінета Беларусі адносна агрэсіўных намераў Расійскай Федэрацыі па ўмяшанні ва ўнутраныя справы Беларусі
Аб’яднаны Пераходны Кабінет Беларусі лічыць неабходным даць прынцыповую палітычную ацэнку нядаўнім заявам афіцыйных прадстаўнікоў Расійскай Федэрацыі, якія могуць сведчыць пра падрыхтоўку да канчатковай ліквідацыі суверэнітэту нашай краіны.
Публічныя выступленні прэс-бюро Службы знешняй разведкі Расіі ад 9 лютага і прадстаўніцы МЗС РФ Марыі Захаравай ад 12 лютага 2026 года ўтрымліваюць непрыхаваныя пагрозы выкарыстаць «усе наяўныя сілы і сродкі», уключаючы ядзерны арсенал, для кантролю над унутрыпалітычнай сітуацыяй у Рэспубліцы Беларусь. Сцвярджэнні расійскага боку пра намер «не назіраць склаўшы рукі» за працэсамі ў нашай дзяржаве з’яўляюцца прамой пагрозай нацыянальнай бяспецы і сведчаць аб пераходзе Крамля да палітыкі адкрытага дыктату.
Падобныя заявы з’яўляюцца грубым умяшаннем ва ўнутраныя справы Рэспублікі Беларусь і беспрэцэдэнтным сігналам аб поўным непрызнанні Расіяй суверэннага права беларускага народа самастойна вызначаць сваю будучыню. Прысвойваючы сабе права ацэньваць легітымнасць беларускіх палітычных суб’ектаў і эфектыўнасць «зачысткі» грамадзянскай супольнасці, Масква дэманструе, што разглядае Беларусь не як незалежную дзяржаву, а як уласны ваенны плацдарм і зону акупацыйнага ўплыву. Мы падкрэсліваем: менавіта імперская палітыка Расійскай Федэрацыі і яе імкненне замацаваць Беларусь у статусе бяспраўнага сатэліта з’яўляюцца сёння галоўнай пагрозай суверэнітэту і незалежнасці нашай краіны.
Да гэтай крытычнай мяжы Беларусь прывяла шматгадовая антынародная палітыка рэжыму Аляксандра Лукашэнкі. Дзеля ўтрымання асабістай улады ён свядома і планамерна гандляваў дзяржаўным суверэнітэтам, дапусціў замежныя спецслужбы да кіравання пытаннямі ўнутранай бяспекі і зрабіў Беларусь закладніцай агрэсіўных планаў Крамля. Сённяшняя сітуацыя, калі лёс беларускіх выбараў і канстытуцыйнага ладу адкрыта абмяркоўваецца ў кабінетах расійскіх сілавых структур, з’яўляецца прамым вынікам здрады нацыянальным інтарэсам з боку Лукашэнкі.
Ва ўмовах, калі Расійская Федэрацыя выказвае актыўнае намер умяшацца ва ўнутраныя справы Беларусі, у тым ліку ваенным спосабам, Аб’яднаны Пераходны Кабінет пацвярджае сваю няўхільную пазіцыю: адзіным эфектыўным адказам на знешнюю агрэсію можа быць толькі ўнутранае адзінства і аднаўленне суб’ектнасці беларускага народа. Мы зноў заклікаем прадстаўнікоў функцыянальных беларускіх улад, якія ўсведамляюць экзістэнцыйную пагрозу страты дзяржаўнасці, да пачатку канструктыўнага дыялогу ў фармаце Круглага стала. Выхад з глыбокага палітычнага крызісу, спыненне рэпрэсій і вяртанне да законнасці — гэта неабходныя крокі для стварэння адзінага нацыянальнага фронту па абароне незалежнасці Рэспублікі Беларусь.
Будучыня нашай дзяржавы павінна вызначацца выключна грамадзянамі Беларусі ў межах дэмакратычных працэдур. Любыя спробы замежнага ўмяшання пад выглядам «гарантый бяспекі» фактычна з’яўляюцца актам агрэсіі, а асобы, якія спрыяюць гэтаму ўмяшанню, павінны панесці адказнасць.
Жыве Беларусь!
Варшава, 12 лютага 2026 года
Беларускае Радыё Рацыя
