Прэзідэнт Украіны Уладзімір Зяленскі падпісаў указ, які ўводзіць у дзеянне рашэнні Рады нацыянальнай бяспекі і абароны адносна выхаду Украіны з канвенцыі аб забароне супрацьпяхотных мін – Аўтаўскай дамовы. Пра гэта паведаміў сакратар камітэта Вярхоўнай рады па пытаннях нацбяспекі Раман Кастэнка.
«Гэта крок, якога даўно патрабуе рэальнасць вайны. Расея не з’яўляецца бокам гэтай канвенцыі і масава прымяняе міны супраць нашых ваенных і цывільных. Мы не можам заставацца звязанымі, калі ў ворага няма абмежаванняў», — заявіў Кастэнка. Ён дадаў, што цяпер гэтае пытанне павінны разгледзець у Вярхоўнай радзе. Раней на гэтым тыдні Літва і Эстонія апавясцілі ААН аб выхадзе з названай канвенцыі. Краіны афіцыйна перастануць быць чальцамі канвенцыі праз шэсць месяцаў пасля апавяшчэння ААН.
Агулам пра намер выйсці з Аўтаскай дамовы паведамілі ўсе краіны Балтыі, Польшча і Фінляндыя. Усе гэтыя дзяржавы мяжуюць з Расеяй, якая ніколі не далучалася да забароны. Краіны патлумачылі сваё рашэнне пагоршанай для чальцоў NATO сітуацыяй з бяспекай у рэгіёне.
