Польскія медыі пішуць пра тое, што на сёлетняй алімпіядзе вельмі імаверна за польскую каманду выступіць беларуская лёгкаатлетка Марыя Жодзік. Яе спартовая спецыялізацыя – скачкі ў вышыню.
Марыі Жодзік 27 гадоў, яна родам з Баранавічаў, цяпер жыве ў Беластоку, у які прыехала ў 2022 годзе.
На чэмпіянаце па лёгкай атлетыцы Беларусі ў 2021 годзе Жодзік усталявала асабісты рэкорд, узяўшы вышыню 1 м 96 см. Яна атрымала права выступіць на Алімпіядзе ў японскім Токіа, але не была дапушчана да гульняў, бо лукашэнкаўскія спартовыя функцыянеры не забяспечылі ў час працэдуру праходжання допінг-тэстаў.
Цяпер Жодзік падала дакументы на атрыманне польскага грамадзянства. Яе называюць найлепшай у сваёй дысцыпліне ў Польшчы. Калі лёгкаатлетка атрымае польскае грамадзянства і да 30 чэрвеня пакажа вынік 1 м 97 см, то зможа ўдзельнічаць у Алімпійскіх гульнях. Але ёсць некалькі ўмоваў. Ёй патрэбная адмысловая пастанова польскага прэзідэнта Анджэя Дуды. І патрэбна скараціць перыяд, цягам якога яна не можа выступаць за іншую краіну — такое рашэнне можа прыняць Міжнародная асацыяцыя лёгкаатлетычных федэрацый.
Важна дадаць, што ў 2020 годзе Марыя Жодзік падпісала адкрыты ліст беларускіх спартоўцаў за свабодныя выбары і супраць гвалту з боку сілавікоў. Таксама яна асудзіла вайну Расеі супраць Украіны.
