Беластоцкая “Ягелонія” у апошнім туры польскай футбольнай экстра-класы здолела адбараніць трэцюю пазіцыю і другі год запар трапіла на п’едэстал.
У матчы з непасрэдным канкурэнтам у заключнай сустрэчы “Ягу” задавальняла нічыя. Урэшце яе і ўдалося дамагчыся, але вельмі няпростым шляхам. У першым таме паядынку з шчэцінскай “Пагоняй” беластачане больш атакавалі, але прапусцілі – па-майстэрску мяч галавой даслаў у сетку гаспадароў лепшы бамбардзір чэмпіянату – грэк Эфціміс Кулурыс. Гэта быў ужо 28-ы (!) яго гол у першынстве.
У другой палове, аднак, “Ягелонія” выявіла свае лепшыя якасці і ўрэшце дамаглася свайго. Пасля шэрагу фатальнага нешанцавання каманда Адрыяна Семенца ўрэшце забіла. На 71-й хвіліне Норберт Вайтушэк параўняў лічбы на табло – 1:1. Далей “Яга” досыць упэўнена згуляла ў канцоўцы і змагла ўзяць заслужаныя бронзавыя медалі чэмпіяната.
Лёс золата польскай экстра-класы вырашаўся ў Познані і ў Чэнстахове. “Лех” у вельмі няпростым паядынку ўсё ж узяў верх над “Пястам” з Глівіцэ – 1:0 і ўрэшце святкаваў чэмпіёнства. “Ракув” хоць і адолеў 2:1 “Відзэў” з Лодзі, але змушаны задаволіцца сярэбранымі ўзнагародамі.
Х. Каменскі, Беларускае Радыё Рацыя
