“Мяшкоў Брэст” дзясяты раз стаў уладальнікам Кубка Белгазпрамбанка па гандболе. У заключным паядынку 16-га па ліку турніру берасцейцы выйгралі ў гандбалістаў другой зборнай Беларусі з лікам 32:29. У першым туры “Мяшкоў Брэст” перамог маскоўскі ЦСКА – 27:23, а затым перайграў пецярбургскі “Зеніт” – 26:24. Рэзервісты нацыянальнай зборнай, якія выступалі пад кіраўніцтвам Юрыя Шаўцова, саступілі зенітаўцам 33:38 і масквічам 30:35. Сёння ў расейскім супрацьстаянні ЦСКА адолеў “Зеніт” з мінімальнай перавагай – 30:29.
“Тарпеда-БелАЗ” прыме “Нёман” у цэнтральным матчы 18-га тура чэмпіянату Беларусі
На чэмпіянаце Беларусі па футболе сярод каманд вышэйшай лігі адбудуцца чарговыя сустрэчы 18-га тура. У цэнтральным паядынку сённяшняга гульнявога дня лідары першынства футбалісты “Тарпеда-БелАЗа” прымуць у Жодзіне гарадзенскі “Нёман”, які займае трэцяе месца ў турнірнай табліцы. Таксама сёння “Іслач” з Менскага раёна згуляе з мазырскай “Славіяй”, а ў Магілёве “Дняпро” прыме футбалістаў “Слуцка”. Напярэдадні берасцейскае “Дынама” на сваёй арэне разграміла салігорскі “Шахцёр” з лікам 3:0, а футбалісты “Віцебска” разышліся мірам з дзяржынскім “Арсеналам” – 0:0.
У Гародні вызначыліся чэмпіёны Беларусі ў вольнай і жаночай барацьбе
У Гародні разыграны дваццаць з трыццаці камплектаў узнагарод чэмпіянату Рэспублікі Беларусь па спартовай барацьбе. У другі дзень спаборніцтваў нацыянальнага першынства сталі вядомы пераможцы і прызёры турніраў у вольнай і жаночай барацьбе. У мужчын залатыя ўзнагароды заваявалі Кірыл Пракопаў (да 57 кг), Дзмітрый Шамела (да 61 кг), Анатоль Грамыка (да 65 кг), Нюргун Скрабін (да 70 кг), Данііл Амельянчык (да 74 кг), Мікалай Савенка (да 79). кг), Расул Ціхаеў (да 86 кг), Аляксандр Гуштын (да 97 кг) і Віталь Песняк (да 125 кг). Уладальніцамі чэмпіёнскіх званняў у дзяўчат сталі Ксенія Станкевіч (да 50 кг), Вікторыя Воўк (да 53 кг), Марта Гетманава (да 55 кг), Арына Мартынава (да 57 кг), Аліна Максімава (да 59 кг), Крысціна Сазыкіна (да 62 кг), Вікторыя Радзькова (да 68 кг), Аліна Шаўчук (да 72 кг), Анастасія Зімянкова (да 76 кг) і Вераніка Іванова (да 65 кг), якая перамагла на чэмпіянаце краіны дзесяты раз.
Польшча плануе правесці Алімпіяду ў 2040 ці 2044 годзе
Прэм’ер-міністр Польшчы Дональд Туск заявіў, што краіна плануе прыняць летнія Алімпійскія гульні. «Рэальная перспектыва, з улікам папярэдніх рашэнняў, абавязацельстваў і дэкларацый Міжнароднага алімпійскага камітэта – гэта 2040 або 2044 год», – сказаў Туск.
Ён адзначыў, што арганізацыя Еўра-2012 у Польшчы да гэтага часу згадваецца еўрапейскімі партнёрамі як арганізацыйны шэдэўр. Туск дадаў, што цэніцца, сярод іншага, тое, што «удалося пабудаваць аўтамагістралі, аэрапорты, стадыёны, а ў многіх месцах пачыналі з нуля». Міністр спорту Славамір Нітрас запэўніў, што Польшча здольная арганізаваць Алімпіяду: «Гэта патрабуе інфраструктурных інвестыцый, але шмат што мы ўжо маем». Наступная летняя Алімпіяда пройдзе ў 2028 годзе ў Лос-Анджэлесе.
Беларускае Радыё Рацыя
