31 сакавіка вызначыліся апошнія ўдзельнікі сёлетняга Чэмпіяната свету па футболе ад еўрапейскага кантыненту.
Каманда Польшчы, на жаль, саступіла на выездзе Швецыі з лікам 2:3.
Палякі два разы раўнялі лік на табло, але на 88 хвіліне пераможную кропку паставіў шведскі нападнік лонданскага «Арсенала» – Віктар Дзьёкерыш.
Косава на сваім полі саступіла Турцыі з лікам 0:1.
Форвард стамбульскага «Фенербахчэ» Керэм Актюркаглу трапным стрэлам вывеў сваю зборную каманду на мундыяль упершыню за 24 гады.
І яшчэ ў дзьвюх сустрэчах пераможца вызначыўся ў серыі пасляматчавых пенальці.
Спачатку Чэхія з Даніяй згулялі 1:1 у асноўны час. Пасля ў дадатковым абмяняліся галамі 2:2.
А ў серыі пенальці крайне няўдала свае падыходы да кропкі выканалі скандынавы.
Лік па пенальці 3:1 і Чэхія праз 20 гадоў вяртаецца на мундыяль.
Боснія і Герцагавіна з Італіяй згулялі ў асноўны і дадатковы час 1:1. А ў серыі 11-метровых італьянцы, як і датчане, свае спробы выканалі крайне неахайна і ў трэці раз запар пакінулі сваю краіну без чэмпіяната свету. Баснійцаў жа трапным ударам з кропкі ў другі раз на мундыяль вывеў гулец з характэрным прозвішчам Байрактаравіч.
У Лізе нацый УЕФА ўчора таксама былі згуляныя пераходныя матчы ў адказ.
Зборная Люксембурга і другі раз, з лікам 3:0 перайграла Мальту.
А Латвія зноў з лікам 1:0 перамагла Гібралтар.
Такім чынам Люксембург і Латвія захавалі месцы ў Лізе С.
А Мальта і Гібралтар застаюцца ў Лізе D.
Учора ў матчы кваліфікацыі Еўра U-21 зборная Беларусі згуляла з камандай Аўстрыі.
Сустрэча прайшла у аўстрыйскім Рыд-Інкрайсе на стадыёне «Кайне Зорген Арэна».
Нашыя хлопцы да апошняй хвіліны трымалі інтрыгу ў матчы і саступілі з лікам 1:2, прапусціўшы вырашальны гол ажно толькі на 94 хвіліне, ад паўабаронцы «Зальцбурга» Яніка Шустэра. У нас жа на 88 хвіліне адзначыўся голам форвард партугальскага «Порту Б» Трафім Мельнічэнка.
Беларусь з 4 ачкамі ў групе І займае апошні пяты радок і страціла ўсе шанцы на праход далей.
Учора прайшоў матч другога раўнда кваліфікацыі чэмпіянату Еўропы-2026 паміж зборнымі Беларусі і Нідэрландаў да 17 гадоў у Лізе Б.
Сустрэча адбылася ў турэцкай Анталлі. І там нашыя юнакі саступілі галандцам з лікам 1:2.
Голам адзначыўся Максім Карповіч.
Такім чынам, наша каманда набрала 3 пункты ў групе 7, заняла 2 месца і сыходзіць з барацьбы за права згуляць на Еўра.
Нагадаем, што з сакавіка 2022-га ўсе клубы і зборныя Беларусі могуць праводзіць хатнія матчы выключна на нейтральнай тэрыторыі і без гледачоў на трыбунах. Такое рашэнне прынятае з-за вайны ва Украіне, якую з 24 лютага 2022 года працягвае Расея з выкарыстаннем тэрыторыі Беларусі.
Таварыскі матч футбольнай зборнай Беларусі супраць Арменіі (2:1) стаў 300-м у гісторыі нацыянальнай каманды, прычым 90-м пераможным.
У папярэдніх юбілейных сустрэчах беларусы таксама бралі верх над супернікамі. Так, у 100-м дамашнім матчы 16 жніўня 2006 года каманда перамагла Андору (3:0), а ў 200-м 31 траўня 2016 года ў гасцях была мацнейшай за зборную Ірландыі.
Акрамя таго Беларусь дамаглася 50-й перамогі ў таварыскіх матчах.
Баланс гэтай катэгорыі ў беларусаў станоўчы: зборная мае 50 перамог, 36 разоў згуляла ўнічыю і пацярпела 41 паразу, пры гэтым каманда забіла 176 мячоў і прапусціла 158.
У афіцыйных матчах у зборнай 40 перамог, 40 нічыіх і 93 паразы, розніца мячоў – 160 забітых і 275 прапушчаных.
Нагадаем, што Віктар Ганчарэнка стаў другім трэнерам у гісторыі, які стартаваў з дзвюх перамог у зборнай Беларусі.
У чарговым матчы рэгулярнага чэмпіянату НХЛ «Калгары» разгромна прайграў «Каларада» з лікам 2:9.
27-гадовы беларускі нападнік «Калгары» Ягор Шаранговіч выйшаў на левым фланзе трэцяга звяна разам з Раянам Строўмам і Віктарам Олафсанам.
На 52-й хвіліне Шаранговіч вызначыўся выніковай перадачай, калі другую шайбу закінуў Строўм.
Беларус правёў на лёдзе 16 хвілін 12 секунд, набраў 1 выніковае ачко (0+1) і завяршыў сустрэчу з паказчыкам карыснасці «0».
У бягучым сезоне НХЛ Шаранговіч прыняў удзел у 70 матчах, у якіх набраў 28 (14+14) ачкоў. Яго паказчык карыснасці складае «-20».
«Пітсбург» разграміў «Айлендэрс» з лікам 8:3.
Абаронца «Пітсбурга» Ілля Салаўёў застаўся ў запасе. Беларус прапусціў ужо шосты матч запар. Апошні раз ён выходзіў на лёд у матчы супраць «Караліны» 19 сакавіка, дзе вызначыўся асістам.
У бягучым сезоне НХЛ Салаўёў правёў 27 матчаў, у якіх набраў 8 (1+7) ачкоў і мае паказчык карыснасці «+2».
«Ванкувер» Мікіты Талапілы саступіў «Вегасу» з лікам 2:4.
Беларус застаўся бэкапам.
У паўфінале беларускай хакейнай Экстралігі менскае «Юнацтва» ў другім матчы з лікам 4:2 перамагло жлобінскі «Металург». Такім чынам лік у серыі да чатырох перамог стаў 2:0 на карысць сталічнай каманды.
Беларуская тэнісістка Арына Сабаленка згуляе на турніры WTA-1000 у Мадрыдзе.
Спаборніцтвы ў жаночай адзіночнай сетцы пройдуць з 21 красавіка па 3 траўня.
Сабаленка з’яўляецца дзеючай пераможцай турніру. У фінале мінулага года яна абгуляла амерыканку Коры Гаўф.
Акрамя таго Арына абышла прадстаўніцу Польшчы Ігу Свёнтак (№4 WTA) па працягласці знаходжання на першым месцы рэйтынгу WTA.
27-гадовая спартоўка ўзнялася на трэці радок у топе працягласці серый знаходжання на лідзіруючай пазіцыі топа ў бягучым 100-годдзі.
Агулам яна знаходзіцца на першым радку ўжо 84 тыдні.
У топ-5 таксама ўваходзяць:
Серэна Уільямс – 186 тыдняў
Эшлі Барці – 114 тыдняў
Арына Сабаленка – 76 тыдняў
Іга Свёнтак – 75 тыдняў
Марціна Хінгіс – 73 тыдні
Юрась Дзяшук, Беларускае Радыё Рацыя
