Завяршыўся групавы этап еўраадбору на чэмпіянат свету па футболе 2026 года.
Учора былі згуляныя заключныя яго матчы.
Каманда Беларусі працягнула двухматчавую нічыйную серыю без паразаў і гэтым разам згуляла 0:0 са зборнай Грэцыі на «ZTE-Арэне» ў венгерскім Залаэгерсегу.
Абаронца беларускай каманды Павел Забелін стаў найлепшым гульцом сустрэчы.
Футбаліст правёў на полі ўвесь матч, выйграў тры верхавых адзінаборствы (100%), пяць з сямі наземных адзінаборстваў, здзейсніў тры паспяховыя адборы (100%), а таксама зрабіў пяць вынасаў.
Раней у сваёй групе С беларусы саступілі Грэцыі (1:5), Шатландыі (0:2 – першы матч, 1:2 – другі). У першым матчы з Даніяй разгромна прайгралі з лікам 0:6, а ў другім – згулялі ўнічыю (2:2).
Такім чынам каманда Карласа Алоса набрала 2 ачкі і заняла апошняе месца.
Адзначым, што ўпершыню ў гісторыі Беларусь скончыла кваліфікацыю на чэмпіянат свету без перамог. Таксама аднойчы беларусы без перамог сканчалі адбор на чэмпіянат Еўропы 2000.
У паралельным матчы нашай групы Шатландыя сустракалася з Даніяй, дзе на коне быў прамы выхад на мундыяль. Цягам сустрэчы Шатландыя двойчы вяла ў ліку, і калі датчане засталіся гуляць удзесяцёх даціснула-такі іх з лікам 4:2 і ўпершыню за 28 гадоў выйшла на чэмпіянат свету па футболе. Па вялікім рахунку, дзякуючы – Беларусі, якая да гэтага прытармазіла Данію.
У іншых матчах:
Аўстрыя згуляла ўнічыю 1:1 з камандай Босніі і Герцагавіны. Такім чынам Аўстрыя ідзе на мундыяль напрамую, а Боснія – у стыкі.
Бельгія разграміла Ліхтэнштайн з лікам 7:0. Пры чым апошнія 4 галы бельгійцы забілі на адрэзку 52, 55, 57 і 59 хвілінаў.
Балгарыя перамагла Грузію з лікам 2:1.
Гішпанія згуляла ўнічыю 2:2 з Турцыяй. І тут першыя ідуць на мундыяль напрамую, а другія – у стыкі.
Косава і Швайцарыя разышліся мірам 1:1. І тут наадварот – другія ўжо могуць сабе браніраваць квіткі на амерыканскі кантынент, а першыя яшчэ пазмагаюцца за гэтае права ў стыкавых матчах.
Румынія разграміла Сан-Марына з лікам 7:1. Але пры гэтым румыны прапусцілі першымі ўжо на 2 хвіліне матча. Гэта быў адзін з двух галоў санмарынцаў за ўвесь адбор. Яшчэ столькі ж яны забілі ва ўчрашнім матчы ў сваю браму.
Швецыя і Славенія згулялі ўнічыю 1:1.
Уэльс з лікам 7:1 разграміў Паўночную Македонію і таксама выйшаў у стадыю плэй-оф чэмпіяната свету па футболе.
У 5-м раўндзе азіяцкай кваліфікацыі чэмпіяната свету зборная Ірака перамагла каманду Аб’яднаных Арабскіх Эміратаў з лікам 2:1.
Вырашальны гол з пенальці на 90+17-й хвіліне забіў паўабаронца Амір Аль-Амары.
Дзякуючы гэтай перамозе каманда згуляе ў міжкантынентальным плэй-оф.
Матчы плэй-оф адбудуцца ў сакавіку 2026 года.
Моладзевая зборная Беларусі па футболе да 21 года сустракалася з камандай Даніі ў матчы групавога адбору на чэмпіянат Еўропы 2027 года. І, на жаль, саступіла з мінімальным лікам 0:1.
Зараз у групе І на экватары турніра пасля чатырох матчаў нашыя хлопцы з 4 ачкамі займаюць 4 месца. На першым, другім і трэцім з 7 ачкамі ідуць Аўстрыя, Бельгія і Данія, на апошнім 5 месцы – Уэльс, у якога 3 ачкі.
Беларуская брыгада арбітраў на чале з рэферы з Маладэчна Антонам Лашуком рассудзіла хіба самую сенсацыйную сустрэчу ўчорашняга дня гэтага турніра па-між зборнымі Андоры U-21 і Ірландыі U-21 адбору да Еўра-2027.
Дапамагалі 33-гадоваму Лашуку – Дзяніс Емяльянчыкаў і Антон Палуянаў. Чацвёртым арбітрам выступіў Амін Кургхелі.
Андорцы сенсацыйна разграмілі ірландцаў на сваім полі з лікам 4:0.
Нагадаем, Лашук з’яўляецца рэферы ФІФА з 2025 года. У бягучым адборавым цыкле ён таксама працаваў галоўным арбітрам на матчы моладзевых камандаў Швецыі і Арменіі.
Учора зборная Беларусі да 19 гадоў пад кіраўніцтвам Сяргея Сасноўскага правяла матч групавога этапа кваліфікацыі чэмпіянату Еўропы-2026 з аднагодкамі з Ліхтэнштайна. І разграміла тых у гасцях з лікам 5:0. 4 галы ўжо да 38 хвіліны забілі Грабцэвіч, Молчан і двойчы Акатаў, і нават пасля выдалення Бахно на 73 хвіліне, на 86 адзначыўся яшчэ і Гусеў.
Нагадаем, што 12 лістапада каманда прайграла Грэцыі з лікам 0:2 і 15-га – саступіла Турцыі таксама 0:2. Учора ж туркі выйгралі ў грэкаў – 2:1.
Турнірнае становішча групы 3: 1. Турцыя – 9 ачкоў, 2. Грэцыя – 6, 3. Беларусь – 3. 4. Ліхтэнштайн – 0.
Учора быў згуляны перанесены матч 1/8 фіналу Кубка Беларусі па футболе паміж «Смаргонню» і «Тарпеда-БелАЗ».
Сустрэча прайшла на стадыёне «Юнацтва» ў Смаргоні. Гаспадары саступілі з буйным лікам 0:4.
Нагадаем, жодзінская каманда раней двойчы перамагала ў Кубку Беларусі: у сезоне-2015/16 і 2022/23.
Шэсць з васьмі чвэрцьфіналістаў турніру ўжо вядомыя. Акрамя жодзінцаў, гэта мазырская «Славія», прысталічная «Іслач», барысаўскі БАТЭ, берасцейскае «Дынама» і койданаўскі «Арсенал». У снежні пройдуць астатнія матчы 1/8 фінала, дзе вызначацца апошнія чвэрцьфіналісты. Менскае «Дынама» 3 снежня прыме «Віцебск», а на наступны дзень «МЛ» у Віцебску прыме каманду ўжо з 3 дывізіёна – «Слонім-2017».
Учора былі згуляныя першыя матчы 26 тура рэгулярнага чэмпіяната беларускай хакейнай Экстралігі.
Салігорскі «Шахцёр» ў Баранавічах перамог мясцовы «Авіятар» з лікам 2:0.
«Дынама-Маладэчна» з лікам 4:2 перайграла «Віцебск».
«Славуціч» у Смаленску прайграў «Брэсту» па серыі булітаў – 3:4.
«Ліда» ў овертайме перайграла «Хімік» з Наваполацка з лікам 5:4.
«Вашынгтон» абыграў «Лос-Анджэлес» з лікам 2:1 у матчы рэгулярнага чэмпіянату Нацыянальнай Хакейнай Лігі.
У гэтай сустрэчы беларускі форвард «сталічных» Аляксей Протас вызначыўся асістам на 4-й хвіліне і перапыніў серыю без набраных ачкоў у шасці апошніх паядынках. Усяго ён правёў на лёдзе 17:05 (24 змены), з іх 01:48 – у меншасці, выканаў 1 кідок у створ брамы, 1 – міма, здзейсніў 1 блок-шот і скончыў матч з паказчыкам карыснасці «+1».
На апошняй хвіліне гульні Аляксей атрымаў траўму. Швайцарскі форвард «кінгз» Кевін Фіяла хацеў выкінуць шайбу, аднак трапіў у Протаса, які накрываў яго, пасля чаго нараджэнец Віцебска ўпаў на лёд ад болю. Гульню спынілі, а Фіяла папрасіў прабачэння ў беларуса.
У бягучым сезоне Протас правёў 19 матчаў, набраў 11 (5+6) ачкоў пры паказчыку карыснасці «+7» і 2 хвілінах штрафу.
«Далас» выклікаў у склад беларускага абаронцу – Уладзіслава Калячонка са свайго фарм-клуба «Тэхас Старз».
У гэтым сезоне ў АХЛ у Калячонка 10 матчаў, 3 (0+3) ачкі і карыснасць «0».
У складзе «Даласа» на дадзены момант траўмаваныя абаронцы Томас Харлі і Нільс Лундквіст. Пашкоджанне таксама атрымаў расеец Ілля Любушкін.
Нагадаем, што ўлетку 2024 года правы на беларуса перайшлі да «Даласа» ў выніку абмену з «Пітсбургам».
Юрась Дзяшук, Беларускае Радыё Рацыя
