Сёлета 12 лістапада спаўняецца чатыры гады з моманту гвалтоўнай смерці беларускага актывіста Рамана Бандарэнкі.
Раман спрабаваў спыніць знішчэнне бел-чырвона-белай сімволікі сілавікамі ў двары шматкватэрнага дома, дзе жыў ён у Менску. Быў жорстка збіты і ў выніку памёр.
На знак памяці і абурэння дзеяннямі ўладаў у Беларусі беларуская дыяспара распачала акцыю ля сценаў Генеральнага консульства Беларусі ў Беластоку, па адрасе Сквер Вольнай Беларусі, 1. Акцыя заклікана нагадаць пра ахвяры лукашэнкаўскага рэжыму і выказаць салідарнасць з палітвязнямі.
Сабралася каля паўсотні чалавек, людзі нясуць знічы да стыхійнага мемарыялу ў памяць Рамана Бандарэнкі і ўскладаюць на ходніках ля консульства.
На акцыі працуюць беларускія карэспандэнты, а таксама Беластоцкае тэлебачанне і радыё. Прысутнічае і паліцыя.
Слова ўзяў старшыня Управы Беларускага Радыё Рацыя Яўген Вапа:
– Балюча, калі людзі гінуць за Радзіму, іх шмат. Як і мараў, што Беларусь не загіне. Мы павінны працягваць гэтую справу, за якую заплочана найвышэйшая цана. Памяць і малітва могуць прынесці сілы ісці далей, каб не раскідалі нашую Беларусь. І мы пераможам!
Працуе вольны мікрафон. Удзельнікі акцыі выказваюцца пра значэнне барацьбы нават аднаго чалавека, як Раман, каб натхніла народ на захаванне сябе і краіны для будучыні.
Героі не паміраюць!
Узгадваюцца ўсё загінуўшыя ў Беларусі і Украіне. Яны загінулі за Беларусь ад рук рэжыму, які захапіў уладу ў краіне.
Зачытваецца верш Насты Кудасавай пра сэрца маці.
Мне не трэба Героя, вярні мне сына…
Раман стаў сімвал сутыкнення Беларусі актыўнай, ініцыятыўнай, новай, у чаканні перамен, і машыны па знішчэнні ўсяго жывога – старога ладу, які не жадае сыходзіць, хаця патрэбныя перамены.
Гучыць заклік быць вартымі такіх людзей і патрабаваць суду над вінаватымі.
Акцыя завершана.
Цалкам матэрыял слухайце ў далучаным гукавым файле:
Беларускае Радыё Рацыя
