Беларуская дыяспара ў Беластоку ў скверы Вольнай Беларусі і каля сцен Консульства Беларусі ў Беластоку правяла акцыю салідарнасці з музыкамі беларускіх гуртоў “NIZKIZ”, “TOR BAND”, арыштаваных рэжымам Лукашэнкі за песні свабоды, ды іншымі зняволенымі дзеячамі беларускай культуры. Паводле звестак праваабарончага цэнтру “Вясна”, за кратамі знаходзіцца каля 100 дзеячаў культуры: акторы, музыкі, архітэктары, танцоры і пісьменнікі.
“Спяваць у Беларусі небяспечна, калі ты не спяваеш для рэжыму Лукашэнкі. Танцаваць небяспечна, калі не танчыць пад дудку дыктатара. Цікавіцца гісторыяй небяспечна, бо можаш апынуцца экстрэмістам. Але мастацтва патрабуе свабоды, як паветра”, – кажуць арганізатары.
Гучыць песня Nizkiz “Правілы”, за якія рэжым помсціць музыкам гурту, і фактычна ўсім беларусам.
“Беларусь у палоне. Дзеячы мастацтва і культуры і Беларусі заўсёды неслі традыцыю, якая нязручная рэжыму, а таму рэпрэсіі працягваюцца. Не толькі ў бок тых, хто ў Беларусі, але на тых, то па-за межамі. Такі мітынг – чарговы крок паказаць нязгоду з рэжымам”, – гучыць з мікрафону пад консульствам.
“Зняволенне беларускіх дзеячаў культуры і смерці ў турмах – гэта знак нам усім выходзіць з-пад уплыву расейскага культурнага поля”.
З-за марозу апаратура на акцыі не спрацоўвае. Але ўдзельнікі акцыі выконваюць усе песні пратэсту па памяці хорам.
“Няма такога марозу, які спыніць прагу беларусаў да свабоды”. У прыклад прыводзіцца паўстанне ў ГУЛАГу, дзе прымаў удзел і беларус Півавараў.
Пасля такой прамовы ды песень апаратура запрацавала належным чынам. Працуе вольны мікрафон.
Гучыць заклік слухаць беларускую музыку, падтрымліваць творцаў, палітвязняў, выходзіць на мітынгі і паказваць, што беларусы і Беларусь жывыя.
Мітынг завершаны.
Беларускае Радыё Рацыя
