Вы калі-небудзь думалі аб тым, як дзяржава зарабляе на мяжы? Гучыць, вядома, абсурдна, як можна зарабляць на тым, што твая краіна з кімсьці мяжуе. Там жа хутчэй толькі выдаткі — ахова, памежнікі і гэтак далей.
Але не. Беларускія таленты змаглі. Глядзіце самі, колькі ўсяго трэба аплаціць, выязджаючы з краіны на ўласнай машыне.
Пачнём з каранавіруснай аплаты за выезд. Яе ўводзілі падчас пандэміі, нібыта для таго, пускаць гэтыя грошы на змаганне з інфекцыяй. Цяпер пандэмія скончылася, а аплата засталася, грошы зараз за выезд будуць браць увесь час. Профіт!
Аплата за электронную чаргу: хочаш-не хочаш, а заплаціш. Бо некаторыя пункты пропуску працуюць толькі па такой сістэме.
Яшчэ ёсць аплата за абавязковую дэзінфекцыю машыны па вяртанні. Тут глядзі пункт першы: інфекцыі няма, а так званыя меры бяспекі, за якія трэба плаціць са сваёй кішэні, ёсць.
Ну і страхоўка, вядома, куды без яе. Страхоўка патрэбная для выезду з любой краіны, скажаце вы. Вядома, але мала дзе ў цывілізаваных краінах вы знойдзеце такога манапаліста, як Белдзяржстрах.
І гэта ўсё – не кажучы ўжо аб кантрабандзе і шэрых міграцыйных схемах. Там круцяцца шалёныя грошы, ніякім Белстатам не ўлічаныя і падаткамі не абкладзеныя.
Беларускае Радыё Рацыя
