Культурныя каштоўнасці без дэкларацыі былі знойдзеныя сярод асабістых рэчаў грамадзяніна Беларусі, які вяртаўся з Польшчы, паведамляе прэс-служба Дзяржаўнага мытнага камітэта.
Паводле ведамства, мужчына накіроўваўся праз “зялёны калідор” пункта пропуску Берасце. Аглядаючы аўтамабіль, мытнік знайшоў карціну, напісаную алеем напрыканцы ХХ стагоддзя, два камінныя гадзіннікі з ліццёвага мармуру і меднага сплаву, а таксама патэфон.
Было высветлена, што карціна і гадзіннікі адносяцца да культурных каштоўнасцяў. Мужчына заявіў, што яму належыць толькі патэфон, а астатнія прадметы яго папрасіў перавезці цераз мяжу незнаёмы чалавек.
У адносінах да грамадзяніна Беларусі распачаты адміністрацыйны працэс. Яму пагражае штраф да 1.260 рублёў з магчымай канфіскацыяй тавараў, што незаконна перамяшчаліся.
Беларускае Радыё Рацыя
