Акруговы суд у Беластоку прысудзіў па чатыры гады зняволення беларусу і расейцу. Іх вінавацілі ў шпіянажы на карысць расейскай вайсковай разведкі, перадае Беларуская рэдакцыя Польскага радыё.
Публічны суд цягнуўся амаль год. Абвінавачаным залічылі ў пакаранне перыяд утрымання пад вартай і арышту.
Абодвух мужчын затрымалі ў красавіку 2022 года. Іх абвінавацілі ў шпіёнскай дзейнасці на карысць Расеі ў 2017-2022 гадах. Паводле звестак пракуратуры, абвінавачаныя збіралі звесткі пра польскія вайсковыя часці, іх размяшчэнне, аснашчэнне і асабовы склад, а таксама пра вайсковыя часткі саюзнікаў.
Абодва замежнікі жылі ў Польшчы легальна. Беларус спачатку вучыўся ў адной з беластоцкіх ВНУ, а потым заняўся арганізацыяй парашутна-дэсантнай падрыхтоўкі. Следства прыйшло да высновы, што так ён наладжваў кантакты, якія выкарыстоўваў для шпіянажу. Расеец вёў шпіёнскую дзейнасць пад выглядам культурніцкай і турыстычнай. Як заяўляе следства, асабліва шпіёнаў цікавілі польскія часці ў раёне беларускай мяжы ў сувязі з міграцыйным крызісам.
