6 снежня ў вёсцы Муравіна, непадалёк ад Шчэцна і Першхніцы, адбыўся восьмы «Капстрыж Паўстанцкі» — штогадовае мерапрыемства, прысвечанае ўшанаванню памяці ўдзельнікаў Студзеньскага паўстання 1863–1864 гадоў. Імпрэзу традыцыйна арганізуе даследчык і пасіянат гісторыі паўстання Рамуальд Садоўскі.
Сёлета ў падзеі прыняў удзел і Клуб гістарычнай рэканструкцыі Invictus 1863 — адзіны беларускі калектыў, які займаецца рэканструкцыяй падзей паўстання на прафесійным узроўні. Удзельнікі прадставілі фрагменты вайсковага жыцця і дэманстравалі элементы ўзбраення і вопраткі паўстанцаў.
Пра фэст распавядае Васіль Калач, адзін з заснавальнікаў Invictus 1863:
– Восьмы «Капстрыж Паўстанцкі» – гэта самы буйны зімовы паўстанцкі фестываль у Польшчы, фактычна які закрывае рэканструктарскі сезон па тэме паўстання 1863 года. З’язджаецца звычайна максімальная колькасць рэканструктарскіх клубаў, менавіта тыя клубы, якія займаюцца рэканструкцыяй паўстання. Ёсць і клубы, якія займаюцца рэканструкцыяй менавіта царскай арміі, царскага войска. Ёсць клубы, якія займаюцца асобнымі аддзеламі.
Па словах Васіля Калача, ўупрацы клуба таксама прымаюць удзел і дзяўчаты:
– Дарэчы, мы, у адрозненне ад шмат якіх клубаў, вельмі рады, калі да нас у клуб прыходзяць жанчыны. У нас з дзевяці чальцоў клуба – тры жанчыны. І гэта для нас вельмі важна. Кася больш прадстаўляе менавіта шляхцянку, якая займалася і лагістыкай.
Васіль Калач таксама шчыра запрасіў усіх жыхароў Беластока на адкрытыя сустрэчы з клюбам Invictus 1863, якія адбудуцца цягам бліжэйшых месяцаў.
Цалкам матэрыял:
Беларускае Радыё Рацыя
Фота: facebook.com
