5 ліпеня на амфітэатральнай пляцоўцы ў Белавежы прайшло традыцыйнае святкаванне Купалля — аднаго з найбольш яскравых і сімвалічных элементаў беларускай народнай культуры. Мерапрыемства арганізавала Беларускае грамадска-культурнае таварыства ў межах цыклу летніх фестываляў «Беларускі народны фэст». Сёлета Купалле прайшло ўжо ў 41-ы раз.
Кажа старшыня БГКТ Васіль Сегень:
– Вельмі шмат народу на мерапрыемстве. Настрой, канешне, толькі адзін – вельмі добры. Надвор’е і публіка не падвяла. Як ёсць такая легенда, хто знойдзе ў гэтую ноч папараць-кветку, будзе шчаслівым, закаханым, знойдзе сваё каханне. І я жадаю ўсім знайсці сімвалічна гэтую кветку.
На сцэне выступалі вядучыя аматарскія і прафесійныя калектывы Падляшша. Асаблівую ўвагу прыцягнуў ансамбль «Світанак» з Вісагінаса (Літва), які прадэманстраваў сапраўдны беларускі дух у сваёй музыцы і танцах.
Кажа кіраўнік «Світанка» Сяргей Шабадалаў:
– Чарговы, але мы прыязджалі больш у Нараўку. Мы шмат гадоў сябруем з калектывам “Нараўчаанкі”, яны прыязджаюць да нас, мы прыязджаем да іх. А вось у гэтым годзе нас запрасіў Васіоь Сегень у Белавежу на такую вялікую імпрэзу “Купалле”. Мы з сабой прывезлі нашы беларускія песні.
Цэнтральнымі момантамі Купалля ў Белавежы сталі пусканне па рацэ вянкоў, запальванне купальскіх паходняў, што асвятлілі вечаровую сцэну, і завяршальны феерверк, які стаў кульмінацыяй свята. Свята суправаджалася кірмашом рамеснікаў, традыцыйнай ежай, жывой музыкай і танцамі пад адкрытым небам.
Цалкам матэрыял:
Беларускае Радыё Рацыя
