У пятніцу, 10 траўня, група з больш як 140 мігрантаў спрабавала штурмам узяць беларуска-польскую мяжу. Гэта адбылося каля 20:00 на рацэ Пшэвлока ў раёне ў Белавежы, паведамляе Памежная служба Польшчы.
Польскія памежнікі адзначаюць, што мігранты паводзілі сябе вельмі агрэсіўна: кідалі камяні і галіны дрэў у бок польскіх патрулёў. Спроба прарыву мяжы была спынена. Мігранты вярнуліся ўглыб Беларусі. На гэтым жа месцы натоўпы мігрантаў штурмавалі мяжу 6 траўня і 10 красавіка.
На мінулым тыдні Згуртаванне былых сілавікоў BYPOL папярэджвала, што спецслужбы Беларусі плануюць масавы прарыў мігрантаў колькасцю 700-800 чалавек праз беларуска-польскую мяжу.
Беларускае Радыё Рацыя
