Валанцёрскі цэнтр “Сустрэча” ў Кіеве запрашае беларусаў далучыцца да збору падарункаў для ўкраінскіх дзетак, што пацярпелі ад расейскай агрэсіі. Падарункі будуць перададзены дзеткам падчас свята Святога Мікалая.
Распавядае беларуская валанцёрка Алена Жаркевіч:
-Валанцёрскі цэнтр “Сустрэча” запрашае ўсіх беларусаў далучыцца да віншавання ўкраінскіх дзетак, у якіх родныя загінулі на вайне праз расейскую агрэсію. Павіншаваць дзетак можна праз наш валанцёрскі цэнтр, праз Беларускі аўтаполк, які кожны тыдзень ездзіць ва Украіну з Польшчы. У Варшаве падарункі можна пакінуць у Музеі Вольнай Беларусі, у Вільні гэта можна зрабіць у “Замку”. А ўсе астатнія гарады – у нас ёсць магчымасць прыняць падарункі ў Познані, Лодзі, Беластоку, але гэта праз асабістыя кантакты.
Алена распавяла, што у 2022 годзе беларусы ва Украіне віншавалі дзетак, якіх вывезлі з-пад Бахумута і чые бацькі загінулі там. У наступныя гады беларусы арганізоўвалі паездкі у Херсон, Харкаў, Чарнігаў. Надыйшоў час для новага збору на Мікалая і Новы год. Для «Сустрэчы» гэта добрая традыцыя і Гэты год не павінен стаць выключэннем.
Беларускае Радыё Рацыя
