Дуэт Sw@da x Niczos намінаваны на прэмію Paszporty „Polityki” 2026 у катэгорыі «Папулярная музыка». Артысты выступяць на цырымоніі ўзнагароджання, якая адбудзецца 11 студзеня 2026 года.
Paszporty „Polityki” — адна з найважнейшых культурных узнагарод у Польшчы, якую штотыднёвік «Палітыка» ўручае маладым творцам за выдатныя мастацкія дасягненні, творчую смеласць і рэальны ўплыў на сучасную культуру. Штогод заключны гала-канцэрт збірае найцікавейшых дзеячаў польскай мастацкай сцэны — ад музыкі, кіно і тэатра да літаратуры і выяўленчага мастацтва.
Sw@da x Niczos гадамі паслядоўна развіваюць свой арыгінальны стыль «Podlasie Bounce», спалучаючы сучасную танцавальную музыку з мясцовай спадчынай рэгіёна і тэкстамі песень на падляшскай мове.
Іх творчасць стала адным з самых пазнавальных музычных галасоў Падляшша — свежай, бескампраміснай і глыбока ўкаранёнай у месцы, адкуль яны паходзяць.
Намінацыя на прэмію Paszporty „Polityki” — гэта важная адзнака для гурта і сімвалічнае прызнанне музычнай сцэны Падляшша на нацыянальным роўні.
Цырымонія ўзнагароджання будзе транслявацца 11 студзеня 2026 года а 20:00 на TVP2 і ў інтэрнэце на YouTube.
Паводле прэс-рэлізу
