Дзень роднай мовы адзначылі 21 лютага беларусы Вільні. Імпрэза адбылася ў Доме нацыянальных меншасцяў.
На пачатку з уступным словам пра гісторыю свята выступіў старшыня віленскага гарадскога беларускага клуба “Сябрына” Валянцін Стэх. Пасля ён перадаў слова галоўнаму арганізатару свята – музыку і кіраўніку фальклорнага гурта “Ойра” Вячку Красуліну.
Як сказаў Вячка Красулін, Міжнародны дзень роднай мовы яны з клубам “Сябрына” ладзяць не ў першы раз у Вільні і, спадзяецца, што не ў апошні:
– Кожны раз мы імкнемся збалансаваць праграму такім чынам, каб гэта была і паэзія, і нейкая традыцыйная культура, прадстаўленая не толькі праз вербальныя варыяцыі. А таксама музыка, спевы, як кажуць, песня душа народа, а мова, гэта язык той душы.
Паводле юрыста і праваабаронцы Ігара Случака, з боку людзей запыт на беларускую мову ёсць, і людзі пачынаюць ёй больш карыстацца:
– З боку дзяржавы сітуацыя такая, што дзяржаўная моўная палітыка ідзе па такім шляху, што руская мова асноўная, а беларуская мова дадатковая. Таму адбываецца абалютная дыскрымінацыя па моўнай прыкмеце, асабліва гэта бачна ў сферы адукацыі. З кожным годам беларускамоўных школ і беларускамоўных навучэнцаў становіцца меней. Старыя школы закрываюцца, новыя школы не адкрываюцца.
Пісьменнік і палітык Павел Севярынец запэўніў у тым, што няма чаго хвалявацца, бо ён заўважыў, што пасля 2020 года беларускамоўных стала нашмат больш, таму беларуская мова не загіне, не прападзе.
“І калі беларус з беларусам будзе размаўляць па-беларуску, то будзе ў нас і вольная, і незалежная дэмакратычная Беларусь”, – падсумаваў Павел Севярынец.
Цалкам матэрыял:
Беларускае Радыё Рацыя
