Форум супольнасці і памежнага развіцця Еўрапейскага Звяза адбудзецца ў Беластоку 28 кастрычніка. Гэта сумесная ініцыятыва ўрада Падляшскага ваяводства і горада. Мэтай Форуму з’яўляецца распрацоўка агульных адказаў на выклікі, з якімі сутыкаюцца ўсходнія пагранічныя рэгіёны ЕЗ, а таксама ацэнка ўплыву канфлікту ва Украіне і гібрыднай вайны на тэрыторыі ўздоўж усходняй мяжы Звяза.
Пра важнасць схода кажа Маршалак Падляшскага ваяводства Лукаш Пракорым:
-Маем мы праблему з закрыццём памежных пераходаў і складаную сітуацыю для нашага мясцовага бізнесу.
Кажа Прэзідэнт Беластока Тадэвуш Трускаляскі:
-Сітуацыя вельмі дынамічная. Закрытая мяжа, розныя абмежаванні, звязаныя з супрацай з Усходам, прывялі да таго, што наша эканоміка стаіць зараз на адной назе. А з іншага боку – патэнцыйныя пагрозы і правакацыі не толькі з усходняга боку.
Форум у Беластоку завершыцца падпісаннем Падляшскай дэкларацыі — дакумента з чаканнямі мясцовых прадпрымальнікаў і самакіраванняў адносна ўрада і Еўракамісіі. Падзея ўключае 10 тэматычных панэляў, якія датычаць абароны і новых тэхналогій. Да падрыхтоўкі Форуму далучыліся прадстаўнікі падляшскага бізнесу. Форум мае падтрымку Міністэрства абароны Рэспублікі Польшча і Міністэрства фондаў і рэгіянальнага развіцця.
Цалкам матэрыял:
Беларускае Радыё Рацыя
