4 сакавіка ў Беластоку Падляшская рада жанчын падсумавала год сваёй дзейнасці і прадставіла вынікі пілотнага даследавання патрэбаў жыхарак ваяводства.
Падчас сустрэчы старшыня рады Ізабэла Семяняка падкрэсліла, што ініцыятыва мае адкрыты характар і гатовая да супрацы з жанчынамі розных нацыянальнасцяў, у тым ліку з беларускамі, якія жывуць у рэгіёне:
– Для ўсіх мы адкрытыя. І ўсіх жанчын, якія жывуць у Падляшскім рэгіёне, мы запрашаем да ўдзелу. У многіх з нас ёсць сваякі ў Беларусі, сваякі майго таты таксама паходзяць з Беларусі. Тут у нас на Падляшшы мы маем шмат і беларусаў і беларусак, павінны мы жыць разам ў згодзе.
Толькі за год Рада рэалізавала больш за 40 ініцыятыў, у тым ліку даследаванне, у якім узялі ўдзел 545 жанчын ва ўзросце 34–54 гадоў. Вынікі паказалі, што многія з іх сутыкаюцца з цяжкасцямі ў спалучэнні прафесійных і сямейных абавязкаў, а таксама адчуваюць патрэбу ў лепшай інфраструктуры і доступе да інфармацыі пра магчымасці падтрымкі.
Кажа Маршалак Падляшскага ваяводства Лукаш Пракорым:
– Мы, як улада ваяводства, запісы з анкетаў улічым у стратэгіі развіцця ваяводства, каб гэты голас жанчын быў пачуты, каб быў запісаны ў дакументах, якія датычныя да стратэгіі развіцця нашага рэгіёну.
Паводле Маршалка, у першым паўгоддзі плануецца завяршыць працэс стварэння дзесяці мясцовых рад жанчын у паветах і гарадах ваяводства. У сустрэчы таксама ўдзельнічалі прадстаўніцы рады і эксперты, якія абмяркоўвалі далейшыя кірункі дзейнасці, у тым ліку новыя праекты ў сферы здароўя, спорту і культурнага супрацоўніцтва.
Цалкам матэрыя:
Беларускае Радыё Рацыя
