У суботу ва Уроцлаве Дональд Туск сустрэўся з ваяводамі з рэгіёнаў, якія пацярпелі ад паводак у апошнія дні. Сустрэча была прысвечана ацэнцы страт, якія панеслі асобныя органы самакіравання і гарады ў выніку стыхіі, паведамляе polskieradio.pl.
Паводле слоў прэм’ер-міністра, «неабходныя рацыянальныя, мудрыя рашэнні адносна вадасховішчаў і іншай інфраструктуры, якія (…) істотна знізяць рызыку страт у выніку паводкі ў будучыні».
Закранаючы пытанне рэканструкцыі пасля паводкі, палітык сказаў, што «ўсё, што мы робім, павінна быць лепш, чым да паводкі». Ён падкрэсліў, што на рэканструкцыю будуць выдзелены «вельмі вялікія сродкі», нацыянальныя і еўрапейскія.
Туск таксама спаслаўся на сітуацыю ў Глогаве, дзе зараз праходзіць кульмінацыя паводкавай хвалі на рацэ Одра. Ён паведаміў, што ў сувязі са складанай сітуацыяй там магчымая арганізацыя пазачарговага пасяджэння крызіснага штаба.
Кіраўнік Міністэрства ўнутраных справаў і адміністрацыі Томаш Сямоняк (Tomasz Siemoniak) запэўніў, што грошы на рэканструкцыю найбольш актуальных элементаў інфраструктуры — напрыклад, мастоў — будуць хутка выдзеленыя. Аднак ён падкрэсліў, што неабходна расставіць адпаведныя прыярытэты, каб у першую чаргу аднавіць найбольш важныя для камунікацыі ўстаноўкі.
Прэм’ер-міністр таксама звярнуўся да ваяводаў з просьбай даваць па магчымасці больш дакладныя дадзеныя па стратах у сваіх ваяводствах.
