Латвійскае войска прыступіла да стварэння сістэмы ўмацаванняў на межах з Беларуссю і Расеяй. Уздоўж мяжы вайскоўцы створаць ланцуг апорных пунктаў, а менавіта ахоўныя ўмацаванні, розныя перашкоды, склады боепрыпасаў.
Усяго на стварэнне сістэмы ўмацаванняў збіраюцца выдаткаваць 303 мільёны еўра, паведамляе LSM. Першая абарончая лінія ствараецца на адлегласці каля кіламетра ад мяжы з Расеяй, недалёка ад пагранпункта Церахава ў Лудзенскім краі. Там вайскоўцы перакопваюць дарогу, капаюць супрацьтанкавы роў для цяжкасці прасоўвання патэнцыйнага агрэсара.
Пакуль гаворка ідзе пра ўмацаванні без мініравання. Латвійскія вайскоўцы збіраюцца ўмацаваць супрацьтанкавыя равы «зубамі дракона», а таксама размясціць апорныя пункты абароны.
Латвійская лінія павінна стаць часткай умацаванняў Балтыйскага вала на межах Эстоніі, Латвіі і Літвы.
Беларускае Радыё Рацыя
