Літва не будзе кампенсаваць страты перавозчыкам, якія засталіся ў Беларусі праз закрыццё мяжы. Пра гэта заявіў міністр транспарту Юрас Тамінскас, перадае Нацыянальнае радыё і тэлебачанне Літвы.
Паводле словаў міністра, урад нават не разглядае магчымасці пакрыцця стратаў: «Гэта не мы іх трымалі, іх трымаў беларускі рэжым». Тамінскас адзначыў, што перавозчыкам загадзя паведамлялі пра рызыку гібрыдных атак з боку Менска і пра магчымасць закрыцця мяжы, таму бізнес павінен быў узважыць наступствы працы «з дзяржавай-агрэсарам».
Міністр таксама дадаў, што нягледзячы на папярэджанні, перавозчыкі працягвалі ездзіць ва ўсходнім кірунку, таму пытанне іх кампенсацыі «не стаіць увогуле».
Сёння Літва зноў адкрыла мяжу з Беларуссю, закрытую ў канцы кастрычніка.
Беларускае Радыё Рацыя
