Літва пазбавіла віду на жыхарства былога супрацоўніка МУС Беларусі Аляксандра Маціевіча, паведамляе партал навінаў Delfi. Партал прыводзіць словы віцэ-спікера літоўскага Сейма Паўлюса Саўдаргаса, які назваў беларусаў, якія ўязджаюць у краіну, «праблемай не толькі для правяраючых іх устаноў».
«Беларуссю кіруе дыктатар, гэтая дзяржава нафаршыраваная спецслужбамі, там для гэтага задзейнічана шмат магутнасцяў, каб расцягнуць сетку беларускіх агентаў у Літве. У нас могуць быць такія агенты, і іх няпроста будзе выявіць Дэпартаменту міграцыі і нашай разведцы», – заявіў Саудгардас.
Былы супрацоўнік міліцыі 33-гадовы Маціевіч, які падчас працы ў сістэме МУС удзельнічаў у рэпрэсіях, а затым пераехаў за мяжу, пасля апублікавання гэтай інфармацыі і пачатку расследавання «разам з жонкай тэрмінова пакінуў Літву», паведаміў у ноч на 1 лютага BelPol.
