Міграцыйны крызіс на мяжы з Беларуссю зацягнецца на гады, такое меркаванне выказаў міністр унутраных спраў і адміністрацыі Польшчы Марцін Кервінскі ў Беластоку падчас наведвання Падляшскага аддзялення Памежнай аховы.
“Усё часцей робяцца спробы нелегальна прарваць польска-беларускую мяжу і трапіць на тэрыторыю Польшчы, – цытуе чыноўніка прэс-служба МУС. – Ніхто не сумняецца, што міграцыйны маршрут праз Беларусь у Польшчу – гэта штучны маршрут, створаны беларускімі службамі. Мы пачынаем працэс умацавання бар’ера на мяжы: больш электронікі, оптаэлектронікі і спецыяльных сродкаў абароны. Павінны гэта зрабіць, бо гэтая практыка выкарыстання міграцыі ў якасці інструмента застанецца з намі на доўгія гады”.
Адзначаецца, што міністр і яго намеснік Чэслаў Мрочак таксама сустрэліся з памежнікамі непасрэдна ў памежнай паласе – у Белавежы і Полаўцах.
Усяго краіны ЕЗ, якія мяжуюць з Беларуссю, сёлета спынілі па меншай меры 5.082 такія спробы (у тым ліку Літва — 145, Латвія — 827).
Беларускае Радыё Рацыя
Фота: pap.pl
