Пяць 70-мятровых назіральных вышак, якія Польшча плануе паставіць на мяжы з Беларуссю, будуць абсталяваныя сучаснымі аптычна-электроннымі прыборамі назірання і рознымі тыпамі камераў, а таксама чырвонымі ліхтарамі, якія будуць свяціць для абазначэння авіяцыйнай перашкоды.
Электронны бар’ер з’явіцца да канца года і дапаможа польскім службам кантраляваць мяжу з Беларуссю ў Падляшскім ваяводстве. Памежная ахова Польшчы ўжо мае восем такіх вышак.
Польскі падпалкоўнік Анджэй Юзьвяк паведаміў агенцтву PAP, што аб’ём інвестыцыяў складзе 47 млн. злотых. Гэтыя інвестыцыі ажыццяўляюцца ў рамках мадэрнізацыі электроннай загароды на сухапутнай мяжы з Беларуссю.
Як сказаў Юзьвяк, месцы былі дакладна выбраныя з дапамогай беспілотных лятацельных апаратаў. Памежная ахова плануе ўзвесці вышкі на ўчастках рэк Свіслач і Істачанка.
