Пасля надзвычайнага паседжання Сейміка Падляшскага ваяводства, якое адбылося 30 ліпеня, дэпутат Сейма Польшчы Кшыштаф Трускаляскі і маршалак ваяводства Лукаш Пракорым выступілі на сумеснай прэс-канферэнцыі, падчас якой выказалі выразную пазіцыю супраць стварэння Цэнтраў інтэграцыі замежнікаў (CIC) у рэгіёне.
Маршалак Лукаш Пракорым адзначыў, што жыхары Падляшша выступаюць супраць стварэння такіх цэнтраў, і падкрэсліў, што рэгіён ужо мае наладжаную сістэму падтрымкі мігрантаў, у тым ліку і тых, хто прыбывае з Беларусі:
-Вельмі важнаым элементам нашага грамадства з’яўляюцца пазаўрадавыя арганізацыі, арганізацыі трэцяга сектару, аб’яднанні, фонды і аргнаізацыі, звязаныя з Каталіцкім Касцёлам. І яны шмат добрага на гэтай глебе робяць.
Кшыштаф Трускаляскі ў сваю чаргу нагадаў, што Падляшша выступае супраць нелегальнай міграцыі, і падкрэсліў важнасць празрыстай і эфектыўнай палітыкі на мяжы з Беларуссю, у тым ліку найхутчэйшага адкрыцця памежных пунктаў пропуску з Беларуссю:
-Хочам, каб хоць адзін з памежных пераходаў быў адкрыты. Але ведаем, якая палітычная сітуацыя ў польска-беларускіх стасунках.
Маршалак у сваю чаргу падкрэсліў, што Сеймік і кіраўніцтва ваяводства не праводзяць і не плануюць праводзіць дзеянняў па стварэнні CIC, а рашэнне, якое датычылася размяшчэння такіх цэнтраў у Беластоку, Ломжы і Сувалках, было прынята папярэднім урадам у 2024 годзе. На сёння папярэднія дамовы аб стварэнні СІС скасаваны і працэс лічыцца закрытым.
Цалкам матэрыял:
Вольга Сямашка, Беларускае Радыё Рацыя
