У суботу, 1 лістапада, аб 11:00, на Усіхсвяцкіх могілках у Беластоку (вул. Высоцкага, 1) адбудзецца ўшанаванне продкаў — Дзяды, арганізаваныя Ініцыятывай па ахове магіл беларусаў.
Як паведаміў прадстаўнік ініцыятывы, краязнаўца Аляксей Трубкін, у праграме — азнаямленне з магіламі беларусаў, а таксама з месцамі пахаванняў, якія ўдалося выратаваць сёлета, дзякуючы супольным намаганням, — ад збору сродкаў да валанцёрскай працы:
– Гэтая экскурсія стала ўжо традыцыйнай. Колькі год запар яе праводзім. Спадзяюся, што ў гэтым годзе беларусы і ўсе жадаючыя, незалежна ад нацыянальнасці, далучацца і змогуць даведацца, дзе ў Беластоку пахаваныя беларускія дзеячы і асобы, якія звязаныя з беларускай гісторыяй і культурай, якія зрабілі значны ўнёсак у развіццё нашай супольнай беларуска-польскай культурнай спадчыны.
Такім чынам, ужо ў гэтую суботу, 1 лістапада, аб 11-й, жадаючых запрашаюць да ўваходу на Усіхсвяцкія могілкі, дзе разам можна будзе ўшанаваць памяць продкаў і беларусаў, пахаваных тут. Вітаюцца кветкі і знічы.
Цалкам матэрыя:
Беларускае Радыё Рацыя
