«Пераборы» – пад такім загалоўкам у галерэі імя Тамары Саланевіч ў Нараўцы адкрылася выстава працаў вытканых майстрыхай Ірэнай Ігнацюк з Ляўкова Старога і яе вучаніц.
Спадарыня Ірэна Ігнацюк і яе вучаніцы прадставілі работы па ткацтве ў тэхніцы перабораў у вялікіх і малых фарматах.
– Навучыла дзяўчат ткаць, і яны так пільна ткалі, што такія харошыя рэчы выткалі. Трэба і людзям паказаць, і сёння паказваем. Усё, што тут, выткалі мае вучаніцы. Вельмі рада, што такія людзі прыходзяць вучыцца ткаць.
– Мае працы тыя коні чорныя і мае працы ружовыя. Я родам з Тыневіч Вялікіх, а жыву ў Барысаўцы. Мяне завуць Мар’я Секаноўска.
– Крыся Ходак. Яна для нас ёсць апорай таго, што мы робім па сваіх дамах.
– Наталля Баўтрамюк. Я таксама неўзабаве вытку першы большы перабор і спадзяюся, што можна будзе пахваліцца і паказаць.
Арганізатар выставы – Таварыства “Спадчына Падляшша”. Ірэна Ігнацюк з мужам трымаюць агратурыстычную гаспадарку, дзе стварылі ткацкую майстэрню. Яна з’яўляецца прадаўжальнікам традыцыйных мясцовых тэхнік ткацтва, вырабляючы пераборы, дываны, двух-, чатырох- і васьмініткавыя тканіны.
Валянціна Лаеўская, Беларускае Радыё Рацыя
