Польшча, Літва, Латвія і Эстонія заклікалі ў сераду Еўрапейскі Звяз пабудаваць лінію абароны ўздоўж мяжы з Расеяй і Беларуссю, каб абараніць ЕЗ ад ваенных пагроз і іншых шкодных дзеянняў з боку Масквы, паведамляе Reuters.
У лісце старшыні Еўразязву лідары чатырох краін, якія мяжуюць з Расеяй і Беларуссю, заявілі, што праект, закліканы абараніць звяз 27 краін з насельніцтвам 450 мільёнаў чалавек, таксама запатрабуе фінансавай падтрымкі ўсіх чальцоў. Прапанова будзе абмяркоўвацца на саміце ў Бруселі, які пачынаецца сёння, 27 чэрвеня.
“Стварэнне сістэмы абароннай інфраструктуры ўздоўж знешняй мяжы ЕЗ з Расеяй і Беларуссю дасць магчымасць вырашыць вострую і надзённую неабходнасць абараніць ЕЗ ад ваенных і гібрыдных пагроз”, – гаворыцца ў лісце чатырох лідараў, з якім азнаёмілася агенцтва Reuters.
Некаторыя дыпламаты ЕЗ ацанілі кошт будаўніцтва такой лініі абароны на зямлі ўздоўж 700-кіламетровай мяжы ЕЗ з Расеяй і Беларуссю прыкладна ў 2,5 мільярды еўра.
Раней прэм’ер-міністр Польшчы Дональд Туск аб’явіў аб плане ўмацавання мяжы з Беларуссю і Расеяй. План атрымаў кодавую назву “Шчыт Усход”. Польскія ўлады плануюць выдаткаваць на яго 10 мільярдаў злотых.
Беларускае Радыё Рацыя
