Прынамсі да канца 2025 года грамадзяне Беларусі ў Польшчы змогуць атрымаць дакумент для падарожжаў паводле ранейшай спрошчанай працэдуры: бясплатна і без доказаў немагчымасці атрымаць свой нацыянальны пашпарт.
Міністр унутраных справаў і адміністрацыі Польшчы падпісаў распараджэнне аб чарговым падаўжэнні дзеяння спрошчаных правілаў атрымання польскага падарожнага дакументу для замежніка для грамадзян Беларусі да 31 снежня 2025 года.
Гэты дакумент замяняе пашпарт у выпадку, калі грамадзянін іншай краіны страціў свой пашпарт і не можа яго аднавіць. Напрыклад, калі пашпарт сапсаваны або калі тэрмін дзеяння скончыўся, а атрымаць новы пашпарт сваёй дзяржавы на тэрыторыі Польшчы немагчыма.
Спрошчаны парадак для беларусаў увялі з 1 ліпеня 2023 года і ўжо не раз падаўжалі яго. Падарожны дакумент асабліва актуальны для беларускіх грамадзян, бо ўлады Беларусі ў 2023 годзе адмовіліся выдаваць і мяняць пашпарты сваіх грамадзян за мяжой.
