Сёлета Польшча скараціла выдачу студэнцкіх віз для замежнікаў у тры, а то і чатыры разы, паведамляе Польскае радыё са спасылкай на МЗС.
Гэта вынік візавага скандалу, які здарыўся пры папярэднім польскім урадзе. Сярод іншага супрацоўнікаў МЗС вінавацілі ў тым, што яны выдаюць студэнцкія візы людзям, якія не плануюць вучыцца, а едуць дзеля працы ў Еўрасаюзе.
Напрыканцы ліпеня з ініцыятывы кіраўніка МЗС Радаслава Сікорскага была ўведзеная працэдура праверкі замежнікаў. Гэта прывяло як да значнага зніжэння колькасці пададзеных заявак, так і да павелічэння колькасці адмоў у выдачы студэнцкіх віз.
Сёлета да канца жніўня замежнікі падалі 13 207 заявак на студэнцкую візу — і амаль пяць тысяч чалавек атрымалі адмовы. 8200 чалавек сталі ўладальнікамі візаў, пераважна гэта ўкраінцы і беларусы.
