У панядзелак у Берліне сольны акустычны канцэрт грае Піт Паўлаў. Тут чакае асаблівая сустрэча — з песнямі, гісторыямі, успамінамі і надзеяй. Спадар Піт абяцае выканаць і старыя хіты, і новыя песні, расказаць, як жывуць беларусы ва Украіне, Польшчы, Грузіі, Даніі, Літве, Швецыі, Фінляндыі, Эстоніі, Латвіі, Нідерландах, Кіпры, а таксама што пішацца, спяваецца і марыцца сёння. Уваход вольны. Данаты артысту вітаюцца.
Да 3-га чэрвеня ў Варшаве працуе фотавыстава «Praz fotaplionku: štodzionnasc’ vajaroŭ». Аўтар здымкаў — Яўген Жураўскі з пазыўным «Салам», баец Палка Каліноўскага. З вясны 2023 года Яўген пачаў фатаграфаваць будні ваяроў на плёначны фотаапарат. Як кажа сам аўтар, ён проста хацеў зафіксаваць звычайныя будні, без пафасу і рамантызацыі вайны. Бо вайна — гэта найперш не баі, а навучанне і побыт у складаных умовах.
У Познані ў гэтыя дні ладзіцца выстава «ДОМ». «ДОМ» – гэта калекцыя ўпрыгожванняў, створаная беларускімі дызайнеркамі Настассяй Рагачовай (брэнд MOKASH) і Марыяй Рэзанавай (брэнд NATURREAMS). Гэта візуальнае разважанне аб пошуках свайго ўнутранага дома. Аб нашых каранях, доме, радзіме і сапраўдным, што на самой справе мае сэнс. Працуе падзея да 10 чэрвеня.
У чацвер у Варшаве – паказ фільма Мары Тамковіч “Пад шэрым небам”. Гэта гісторыя, натхнёная лёсам журналісткі Кацярыны Андрэевай, зняволенай за сваю працу. Беларусь, 2020 год. Працягваюцца пратэсты пасля прэзідэнцкіх выбараў, сфальсіфікаваных Лукашэнкам. Журналістка Лена асвятляе разгон мірнага пратэсту. Міліцэйскі беспілотнік адсочвае яе, але Лена працягвае весці рэпартаж і яе затрымліваюць. Яе муж Ілля робіць усё, каб выратаваць жонку, але ўлады маюць намер зламаць іх абодвух. Па сеансе адбудзецца размова з рэжысёркай Марай Тамковіч і дыстрыб’ютарам Гжэгажам Рыльскім. Уваход вольны. Трэба толькі пабраць бясплатныя квіткі ў касе кінатэатра.
Такія падзеі чакаюць нас бліжэйшым часам. Далучайцеся!
Беларускае Радыё Рацыя
