У Расеі спрасцілі атрыманне расейскага грамадзянства для грамадзян Беларусі, Казахстана і Малдовы. Адпаведны ўказ падпісаў сёння, 18 снежня, прэзідэнт РФ Уладзімір Пуцін. Ён уступае ў сілу з дня падпісання, паведамляе reform.by.
Фота: Рixabay.com
Згодна з указам, грамадзяне Беларусі, Казахстана і Малдовы, якія пастаянна пражываюць у Расеі, маюць права падаць заяву аб прыёме ў грамадзянства ў РФ незалежна ад тэрміну пражывання ў РФ.
Пры гэтым на беларусаў не распаўсюджваюцца патрабаванні аб валоданні расейскай мовай і веданні гісторыі і аснова заканадаўства РФ. Грамадзяне Малдовы і Казахстана павінны прадаставіць дакумент, які пацвярджае валоданне расейскай мовай.
Варта адзначыць, што ва ўказе назва нашай краіны пазначана як “Рэспубліка Беларусь”.
Паводле расейскай статыстыкі, у першым паўгоддзі 2023 года расейскае грамадзянства ўжо атрымалі 4 557 беларусаў і 13 876 казахстанцаў.
