Праваабаронца Раман Кісляк пасля публікацыі ў грузінскіх СМІ інфармацыі пра падачы на статус міжнароднай абароны заўважыў акалічнасць звязаную з беларусамі ў гэтай краіне. Па інфармацыі Міністэрства ўнутраных справаў Грузіі, за 5 год па статус міжнароднай абароны звярнуўся 41 беларус.
Пра атрыманне статусу міжнароднай абароны для беларусаў праваабаронца не ведае:
– Не ведаю такіх выпадкаў. Была інфармацыя, але яна не пацвердзілася. Я гляджу статыстыку МУС. Па іх дадзеных, з 2019 па 2023 год такіх статусаў грамадзянам Беларусі не выдаваў. Таму сітуацыя такая. Мы паглядзелі статыстыку і Польшчы. У Польшчы таксама мала выдаюць уцякацтва. Аказваецца, большасці беларусаў выдаюць гуманітарны статус.
Па словах Рамана Кісляка беларусы трапілі ў так званую «пастку малых лічбаў»:
– Сітуацыя ў Грузіі такая, што тут мы трапляем у такую пастку малых лічбаў, беларусы ў Грузіі практычна не падаваліся на ўцякацтва. Гэтая лічба невялікая, калі бяром статыстыку падачы – у 2019 – адзін, у 2020 – двое, у 2021 – 10, а ўжо ў 2022 – 7, а ў 2023 – 21. То бок, калі параўнаць з тымі лічбамі падачы на ўцякацтва з еўрапейскімі краінамі ці ЗША, то гэта несувымерна.
Праваабаронца Раман Кісляк жыве ў Грузіі амаль тры гады і за гэты час юрыдычна дапамагае беларусам, што рознымі шляхамі трапілі ў Грузію, а таксама з’яўляецца намеснікам старшыні арганізацыі «Беларуская дыяспара ў Аджарыі».
Беларускае Радыё Рацыя
